កាណាដា៖ ប្រធានបាល់ទាត់កាណាដា លោក Nick Bontis បានប្រកាសពីការលាលែងចេញពីតំណែងនៅថ្ងៃនេះ និងមានអានុភាពភ្លាមៗតែម្តង ដែលការលាលែងពីតំណែងនេះកើតមានឡើងចំពេលដែលវិវាទនៅតែបន្តកើតមានរវាងស្ថាប័នគ្រប់គ្រងបាល់ទាត់ ជាមួយនឹងក្រុមជម្រើសជាតិបុរស និងក្រុមជម្រើសជាតិស្រ្តីនៃសហព័ន្ធកីឡាបាល់ទាត់កាណាដា។
លោក Bontis ត្រូវបានតែងតាំងជាប្រធានសហព័ន្ធបាល់ទាត់កាណាដាកាលពីខែវិច្ឆិកា ឆ្នាំ២០២០ បានបញ្ជាក់ថា កម្មវិធីបាល់ទាត់ទាំងពីរ (បុរស និងស្រ្តី) ត្រូវបានគេកាត់បន្ថយកញ្ចប់ថវិការ ដែលលោកអះអាងថាអាចនឹងជាការចុះហត្ថលេខាលើកញ្ចប់ថវិការក្នុងកម្រិតចរចាមិនធ្លាប់មានក្នុងប្រវត្តិសាស្រ្ត។
ក្រុមបាល់ទាត់ស្រ្តីកាណាដា កាលពីពេលថ្មីៗនេះបានបង្កើនការតវ៉ារបស់ពួកគេជុំវិញបញ្ហាប្រាក់បៀវត្សរ៍ និងបានពាក់អាវពណ៌ស្វាយដែលមានសរសេរនៅលើអាវថា "Enough is enough" មុនចាប់ផ្តើមការប្រកួតពានរង្វាន់ SheBelievesCup។ កិច្ចព្រមព្រៀងចុងក្រោយរបស់ក្រុមបាល់ទាត់ជម្រើសជាតិនារីជាមួយស្ថាប័នបាល់ទាត់កាណាដា (Canada Soccer) បានផុតកំណត់កាលពីឆ្នាំ២០២១ ខណៈដែលក្រុមបុរសឯណោះវិញបានបង្កើតសមាគមន៍កីឡាករផ្ទាល់ខ្លួនរបស់ពួកគេកាលពីខែសីហា ឆ្នាំ២០២២កន្លងទៅ និងកំពុងចរចាលើកិច្ចព្រមព្រៀងផ្លូវការជាលើកដំបូងនាពេលឆាប់ៗខាងមុខនេះផងដែរ៕
